CASE-ის აკადემიის კურსანტებს საქართველოს კენდოს ეროვნულმა ფედერაციამ სპეციალური მასტერკლასის ფარგლებში უმასპინძლა.
მასტერკლასს ფედერაციის პრეზიდენტი გიორგი ლეკაშვილი უძღვებოდა. შეხვედრის ფარგლებში მონაწილეები გაეცნენ კენდოს როგორც პრაქტიკულ საბრძოლო ხელოვნებას, მის ძირითად ტექნიკურ ელემენტებსა და ვარჯიშის სპეციფიკას. კურსანტებს შესაძლებლობა ჰქონდათ უშუალოდ ჩართულიყვნენ საცდელ ვარჯიშში და პრაქტიკაში გამოეცადათ კენდოსთვის დამახასიათებელი მოძრაობის, კონცენტრაციისა და მოქმედების პრინციპები.
შეხვედრის მნიშვნელოვანი ნაწილი დაეთმო კენდოს კულტურულ და ღირებულებით საფუძვლებს: სამურაის ტრადიციას, დისციპლინას, თვითკონტროლს, პასუხისმგებლობას, მოწინააღმდეგის პატივისცემასა და რთულ ვითარებაში სიმშვიდის შენარჩუნებას.
კენდო, იაპონურად „ხმლის გზა“ თანამედროვე იაპონური საბრძოლო ხელოვნებაა, რომლის პრაქტიკაშიც ფიზიკურ მომზადებასთან ერთად მნიშვნელოვანი ადგილი უკავია პიროვნული დისციპლინისა და ხასიათის განვითარებას.
CASE-ისთვის მსგავსი პრაქტიკული აქტივობები სასწავლო პროცესის მნიშვნელოვანი ნაწილია. მათი მიზანია კურსანტებს მისცეს შესაძლებლობა, პროფესიულ ცოდნასთან ერთად განსხვავებულ გარემოში გამოცადონ ისეთი უნარები, როგორებიცაა კონცენტრაცია, სწრაფი გადაწყვეტილების მიღება, ემოციების კონტროლი, დისციპლინა და წნეხის პირობებში მოქმედება.
მასტერკლასი კურსანტებისთვის იქცა შესაძლებლობად, უშუალოდ გაცნობოდნენ მრავალსაუკუნოვანი საბრძოლო კულტურის თანამედროვე პრაქტიკას და დაენახათ, როგორ შეიძლება სამურაის კულტურაში ჩამოყალიბებული პრინციპები უკავშირდებოდეს თანამედროვე პროფესიულ გარემოში საჭირო თვითკონტროლს, პასუხისმგებლობასა და ფსიქოლოგიურ მდგრადობას.
CASE მადლობას უხდის საქართველოს კენდოს ეროვნულ ფედერაციას და მის პრეზიდენტს, გიორგი ლეკაშვილს, მასპინძლობისა და გამოცდილების გაზიარებისთვის.