რუსეთის საზღვრებში მორიგი სამხედრო შეტევა განხორციელდა - ვინ დგას მის უკან?

18 იანვარს ბრიანსკის ოლქში, რუსეთის ფედერაციის ტერიტორიაზე რუსეთის თავდაცვის სამინისტროს კუთვნილ "ურალის" მარკის სატვირთოს გზაზე გადაადგილებისას შეიარაღებულმა პირებმა ცეცხლი გაუხსნეს, შიგნით მყოფი ყველა სამხედრო დაიღუპა.

შეიარაღებული გასტროლები რუსეთის ტერიტორიაზე გასული წლიდან რუტინულ ხასიათს იღებს "რუსი მოხალისეების კორპუსისთვის" - ანტი-პუტინისტური სამხედრო შენაერთი რომელიც უკრაინის მხარეს მებრძოლი რუსი დისიდენტების მიერ არის დაკომპლექტებული. 18 იანვარს განხორციელებულ ჩასაფრებაზე სწორედ მათ აიღეს პასუხისმგებლობა და შეტაკების ამსახველი კადრები გამოაქვეყნეს.

რუსეთის ტერიტორიაზე პირველი თავდასხმა 2023 წლის 2 მარტს განხორციელდა, სადაც რუს მოხალისეთა კორპუსმა გაარღვია ბრიანსკის საზღვარი და FSB-ს სასაზღვრო ჯარებს დაუპირისპირდა - დივერსიული ჯგუფი დანაკარგის გარეშე დაბრუნდა შინ.

შემდგომი მასშტაბური რეიდი განხორციელდა ბელგოროდში, საიდანაც მოხალისეები შინ ასევე მინიმალური დანაკარგებით და ნაალაფარი ტექნიკით დაბრუნდნენ შინ.

2023 წლის 8 ნოემბერს კი მოხალისეებმა რუსული FSB-ს ლეიტენანტ-პოლკოვნიკი სერგეი სატინის ლიკვიდირება მოახდინეს, რომელი შემთხვევაც ასევე აღბეჭდილი იქნა ვიდეოზე და საბრძოლო შენაერთის ტელეგრამ-არხზე იქნა განთავსებული.

გასული წლის მანძილზე "რუსი მოხალისეების კორპუსი" ფართო მასშტაბით ანხორციელებდა რუსეთის ფედერაციის სასაზღვრო ზოლებზე დივერსიულ ოპერაციებს და დამხმარე ძალად ედგა უკრაინის შეიარაღებულ ძალებს.

როგორც მოხალისეთა კორპუსი იუწყება, მათი მთავარი მიზანი "რუსეთის განთავისუფლებაა პუტინის სისხლიანი რეჟიმისგან" და რომ მათ სურთ "შედარებით მცირე, ეთნიკური რუსეთი".

წყარო: New Voice & RVC Telegram Channel