აფხაზური ოპოზიცია ზურაბიშვილს ეწინააღმდეგება

13 წელია ევროპარლამენტში საქართველოს პრეზიდენტის მიმართვა არ გაჟღერებულა. მაგრამ 2023 წლის 31 მაისს სალომე ზურაბიშვილი, საერთაშორისო ტრიბუნაზე 39 წუთიანი მოხსენებით წარსდგა და ევროპარლამენტს, საქართველოსთვის ევროკავშირის კანდიდატის სტატუსის მინიჭება სთხოვა. მან ხაზი გაუსვა აღნიშნული საკითხის აქტუალურობას რუსული აგრესიის პირობებში. კერძოდ, ისაუბრა უკრაინაში რუსეთის შეჭრაზე. გარდა ამისა, ახსენა აფხაზეთი და სამაჩაბლო (სამხრეთ ოსეთი), როგორც საქართველოს შემადგენელი ნაწილები, ევროკავშირის კანდიდატის სტატუსის მინიჭების ბენეფიციარებად.

ნაწილობრივ, მისი გამოსვლა ფოკუსირებული იყო აფხაზური ოპოზიციის მხარდამჭერ განცხადებებზე, რომლებიც მისი თქმით, კრემლის რეჟიმის საწინააღმდეგო შინაარსის შემცველია. აფხაზურმა ოპოზიციამ მალევე გამოაქვეყნა ახალი განცხადება, სადაც მისი მხრიდან გავრცელებული კომენტარები რუსეთის წინააღმდეგ, კატეგორიულად უარყო. მიუხედავად ამისა, როგორც კავკასიის რეგიონში მიმდინარე ყველა პოლიტიკურ საკითხში, სიმართლე სადღაც შუაშია და განსხვავებულად გამოიყურება იმის მიხედვით, თუ რომელი კუთხიდან შევხედავთ მას.

კრიტიკულად მნიშვნელოვანი და საყურადღებო საკითხია, აფხაზეთში ოპოზიციურად განწყობილი ჯგუფების რაოდენობის ზრდა და გაძლიერება. მიუხედავად იმისა, რომ არ არსებობს პირდაპირი სიგნალები, აფხაზეთის ე.წ. პრეზიდენტის, ასლან ბჟანიას მმართველობის პირობებში არსებული საფრთხეების შესახებ, რეგიონში უსაფრთხოების რისკები ვითარდება და შესაბამისად მონიტორინგის გაგრძელებაც საჭიროა. რუსეთის ძალაუფლების ნებისმიერი მნიშვნელოვანი კრახი შეამცირებს ბჟანიას გავლენას ოკუპირებულ რეგიონში, რამაც შეიძლება არსებული დაძაბულობის სწრაფი ესკალაცია გამოიწვიოს.