ჰაკერული ინსტრუმენტის “NLBrute-ის” ავტორი რომელიც რამოდენიმე თვის წინ საქართველოში დააკავეს უკვე აშშ-შია ექსტრადირებული და დღეს პირველად წარსდგა ფლორიდის სასამართლოში. მას კიბერ სივრცეში “dpxaker”-ის მეტსახელით იცნობენ. აშშ-ს იუსტიციის დეპარტამენტის ცნობით დარიუ პანკოვი აღნიშნული ინსტრუმენტით Microsoft Windows-ის ოპერაციულ სისტემების RDP (Remote Desktop Protocol)-ში აღწევდა ბრუტფორსის მასიური შეტევით. იგი ბრალდებულია 35,000-მდე კომპიუტერში შეღწევისა და 350,000 აშშ დოლარზე მეტი თანხის უკანონოდ მითვისებაში. კიბერ დანაშაულის, თაღლითობის, ჯაშუშობისა და სხვადასხვა ბრალდებებით ამჟამად მას 47 წლიანი პატიმრობა ემუქრება. უკვე ცნობილია, რომ პანკოვი მის ჰაკერულ პროგრამას, ე.წ. დარქ ვებში ყიდდა კრიპტოვალუტის სანაცვლოდ. მისი დაკავება არ ნიშნავს, რომ მოწყვლადობა დახურულია და კიბერ კრიმინალები ვეღარ შეძლებენ აღნიშნული სისუსტეებით სარგებლობას, რითაც აღწევდნენ სხვადასხვა მომხმარებლების კომპიუტერებში.
“ბოლო წლებია რუსი ჰაკერების აქტივობა რეგიონში რამდენჯერმე გაზრდილია. საინტერესოა, რომ ორ სხვადასხვა ვექტორში. ერთი მხრივ იმატა კიბერ კრიმინალმა საქართველოს მოქალაქეების წინააღმდეგ, რომელიც ძირითადად ფიშინგის სახით მიმდინარეობს და მეორე მხრივ ჩვენი ქვეყანა აშკარად სულ უფრო მიმზიდველი ხდება მსგავსი აქტორებისათვის”
ლაშა პატარაია
CASE-ის დირექტორი
CASE-ის მოგიწოდებთ განაახლოთ თქვენი ოპერაციული სისტემა და ანტივირუსი. ხოლო თუ სარგებლობთ არალიცენზირებული პროგრამული უზრუნველყოფით, შეიძინეთ ლიცენზირებული ვერსია, რომელიც გაცილებით დაცულია ვიდრე მისი უფასო ალტერნატივები. კიბერ უსაფრთხოების შესახებ მეტი ინფორმაციისთვის გაეცანით CASE-ის ბლოგს.